Nahitabo ang mubo nga tensiyon sa atubangan sa Police Regional Office-7 kaganinang buntag atol sa protesta sa mga militanteng grupo ubos s Bagong Alyansang Makabayan central Visayas atol sa anibersaryo sa Edsa People Power Revolution .
Nagmartsa ang mga militanteng grupo gikan sa Fuente Osmeña subay sa Osmena Boulevard ug nihapit sa headquarters sa Police Regional Office-7 sa Camp Sergio Osmena Sr , aron isinggit ang ilang mga kasagmuyo ilabi na sa giingon niini nga extra judicial killings.
Apan maoy ilang naabtan ang kusug kaayong tukar sa theme song sa cartoon nga
Voltes V nga gipatugtog sa PRO-7 .
Gilunod sa kusug nga tugtog ang tingog sa mga raliyista , hinungdan nga ila kining gikasuko ug gipukpok ang gate sa PRO-7 .
Dali hinoon nga napakalma sa mga pulis ang mga raliyista ug nakapadayon na kini sa ilang march protest paingon sa dalan Colon alang sa ilang programa .
