Dida man gud han nakalabay nga Sabado, July 15, 2023, gindumara an ground breaking ceremony han P337.7 Million nga kaparte han nagpapadayon nga Maydolong- Basey Road Project nga gin-pondohan ipinaagi han 4PS Partylist ha ilarom ni Minority Leader Congressman Marcelino Libanan.
An Sipag Access Maydolong-Basey Road project in an pagsemento han 2.48 km road nga tikang ha Brgy Del Pilar, Maydolong Eastern Samar tipakadto ha probinsya han Samar.
Sumala kan Jimmy Ulpati, Barangay Kagawad han Brgy Del Pilar ha mao nga bungto, kun mahuman na an mao nga kalsada, mas mapapadali na an pagbaligya han ira mga produkto tikadto ha iba nga lugar ha probinsya han Samar, Tacloban City ngan Leyte.
“Dako an amon pagpasalamat nga nagkaada ngan harani na matapos ine nga proyekto, tungod hine madali na an amon pagkadto ha iba nga bungto ngan haraniay na kami ha Tacloban kun diin pwedi namon maibaligya an amon mga produkto,” siring ni Ulpati.
Ha luyo nga bahin, nagpadangat gihapon hin dako nga pasalamat hi Maydolong, E. Samar Mayor Godofredo Garado kan Cong. Libanan ha paghatag hin prayoridad nga mapondohan an mao nga proyekto. Ine daw in magtutuman han inop han mga taga Maydolong nga mapapadali an access han transportasyon tikadto ha sentro han Eastern Visayas.
“Dako an maibubulig hine ha Maydolong kay ine na primiro nga mahihingadtoan nga bungto ha Eastern Samar (tikang ha Samar), magigin barato an papriton ngan madali na an transportasyon,” siring han Alkalde.
Nagpatapod naman hi Cong. Libanan, nga padayon an iya opisina ha pagbiling hin pondo agud tim-os na nga mahuman an mao nga kalsada.
“Sa ating hangarin na patuloy na pagandahin ang buong isla ng Samar tiwala tayo na sa lalong madaling panahon ay sama-sama nating pauunlarin at matutuldukan ang kahirapan ng ating probinsya at ng buong isla ng Samar,” siring ni Libanan.
Samtang, gindumara gihapon kakulop nga adlaw an pareho nga groundbreaking ceremony para ha pagtikanng 2.5 ka kilometro nga kalsada tikang ha Brgy. Guirang Basey Samar.
Mahitungod hine nga mga proyekto, masumatotal 9.32 ka kilometro nala nga kalsada nga nagkokonektar han Samar ngan Eastern Samar an dire pa sementado kun diin ginlalauman nga mapondohan ipinaagi han General Appropriations Act ha tuig 2024.
Kun mahuman na an mao nga proyekto, mahihimo nala nga sobra duha ka oras an pagbyahe tikang ha Tacloban City tipakadto ha Borongan City ha Eastern Samar tikang ha 4 ngadto ha lima ka oras nga pagbiyahe.
