Mga residente nan Purok Pag-asa, Brgy. Washington, Surigao City na may hulga sa landslide an mga taghuy-an tagtakda ipatawag silom adlawa sa Sangguniang Panlungsod
Tagtakda ipatawag silom sa alas 2:00 sa hapon sa Sangguniang Panlungsod an mga residente gikan sa Purok Pag-asa, Brgy. Washington, Surigao City na may hulga na maapektuhan sa landslide an ila taghuy-an na mga panimayay. Ini an nadesisyunan sa dihang otro nagtigom an mga kadagkuan nan City Disaster Risk Reduction Management Office sa pagpanguna ni Engr. Elmer Tecson kaiban an mga representante sa Mines and Geosciences Bureau, City Social Welfare Office, City Health Office, City Planning ug iban pa.
Sumaya pa ni Vice Mayor Alfonso Casurra, sa report nan MGB may peligro sa napahimutangan nan mga residente, kinahanglan an pagpatawag sa mga ini labi na an pagpasabot na kinahanglan na temporaryo na ipabakwit labi na adton jaon napahimutang sa 10 meters radius na kon diin nagsugod na pagdahili an lupa. Tagtudlo pa, ini na mga lakang an taghimo nan gobyerno sa siyudad para malikayan an posible na panghitabo sa landslide labi na kay sige nag-uyan-uyan an panahon, hutok an lupa sa palibot.
Nanhingusog an Bise Mayor, an mga sunod-sunod na tigom na ila tagpatawag para sa karadjawan sa mga residente na dili mabutang sa alanganin an mga kinabuhi. Lakip isab na dili nija gusto na mapareho sila sa mga opisyales sa Antipolo City na nangapriso resulta sa trahedya sa Cherry Hills Subdivision na kon diin natabunan nan lupa ug maarang an mga nangamatay.
