General Santos City–Gikumpirma ni Malungon Municipal Mayor Atty.Tessa Constantino nga nakabalik na sa ilahang mga tagsa-tagsa ka pinuy-anan ang mga pamilya nga naapektuhan sa sunod-sunod nga linog sa maong lugar.
Matud pa sa mayor nga bag-o gipabalik nila ang mga pamilya sa ilang pinuy-anan duna silay gihimong briefing, medical check-up aron nga masiguro nga anaa sa maayong kundisyon sa panglawas ang mga tawo.
Pagpaklaro usab sa opisyal nga ilahang gihatagan ug mga tents kadtong mga pamilya nga naguba gayud ang ilang balay sa linog ug gipanghatagan usab nila ug mga pagkaon aron duna silay makaon sa ilang panimalay.
Dugang asoy ni Mayor Constantino nga nakahibalo na ang mga tawo sa Malungon nga ang ginoo ra gayud ang nasayod sa tanang panghitabo ug dili lang mawad-an ug paglaum ug kanunay lang mag-ampo.
Luyo pa man sa mga kalamidad nga nahitabo sa maong lugar padayon lang gihapon nga magkinabuhi inubanan sa pagsalig sa ginoo ug dili himoong rason nga maundang na ang ilang mga pangandoy sa kinabuhi.
Daku man usab ang pagsalig sa mayor nga karong tuig 2020 dili sila pasagdan sa mahal nga makakagahum ug nagtuo kini nga ihatag sa gihapon sa Ginoo ang ilahang mga panginahanglanon. (Reynald Timario)
