Nagsugod na sa pag-repair ug pagtukod sa ilang mga balay ang mga residente sa Marawi City sulod sa ground zero o most affected area, human ang halos tulo ka tuig nga giyera sa gobyerno batok sa mga militanteng Dawlah Islamiya.
Gilangkuban sa 20 ka mga pamilya ang unang batch sa mga residenteng gitugtan na nga makasulod sa Barangay Tolali, usa sa 24 ka mga barangay nga anaa sulod sa 250 thousand hectares nga most affected area.
Ang most affected area maoy lugar sa Marawi kung asa nahitabo ang giyera sulod sa lima ka bulang niadtong 2017. Mao kini ang sentro o business center sa siyudad. Nangaguba ang mga building, dagku ug gagmay, tungod kay giapilan og airstrike ang pagpuhag sa mga rebelde.
Apan matud pa ni Tolali Barangay Chairman Moamer Usman Pantao, sagol ug kaguol ang ilang kalipay sa maong kalamboan tungod kay wala pay linya sa suga ug tubig ang dapit nga gikinahanglan sa ilang pagtrabaho.
Mas daku, matud pa, ang ilang magasto kung wala ang maong mga linya tungod kay dugang kini sa suhulan sa maghakot og tubig gikan sa gawas ug dugang gasto ang pag-renta og generator set ug pagpalit og gasolina niini.
Duna nay laing kapin 80 ka pamilya ang naghupot na’g approved building permit alang sa next nga batch nga magtukod sa ilang balay apan gi-freeze lang una kini karon sa Task Force Bangon Marawi tungod sa ipatumang road widening. (Divina M. Suson)
