Nagbinantayon na sa ilang mga aprubahang resolusyon ang mgasakop sa Sangguniang Panlungsod ning dakbayan sa Iligan human makatilaw og suspensiyon ang 13 sa 15 ka mga sakop kanila.
Mibalik na sa ilang trabaho kagahapon human ang usa ka bulan ugusa ka adlaw nga suspensiyon ang 13 ka mga sakop sa SP, kauban si Vice Mayor Jemar Vera Cruz.
Sa buntag, gipahigayon ang blessing ug unvieling sa PedroGeneralao Building o ang Legislative Building ug pagka-hapon gihimo ang regular nga session.
Sa maong session, halos katunga sa mga agenda, nga mao untaang pag- apruba sa mga resolusyon, ang gibalik o gi-defer sa SP ngadto sa City Legal Office aron tun-an pag-ayo.
Kini gilangkuban sa mga resolusyon nga maghatag unta’g utoridad o pagtugot kang Mayor Celso Regencia nga mopirma sa renewal of contract of services o kontrata sa pag-serbisyo sa mga legal associates sa City Legal Office ug sa City Mayor’s Office, gikan sa Enero 1 , 2018 hangtud sa Hunyo 30 , 2018.
Apan miingon si KonsehalSamuel Huertas nga nagsugod ang ilang suspensiyon dihang gi-serve kini niadtong Enero 4, human sa ilang unang regular session alang sa tuig 2018.
Nagpasabot nga wala na silay opisyal nga transaksiyon human nila madawat ang desisyon sa Court of Appeals hangtud niadtong Pebrero 5.
Miingon si Huertas nga angayang mag- amping na sila sa ilang mga aprubahan tungod kay basin og perpetual disqualification na ang ilang matagamtam sa sunod.
Gawas sa resolusyon alang sa renewal sa contract of services sa mga abogado, aprubahan usab unta ang susamang resolusyon alang sa ubang mga consultants nga magdawat og tag-35 mil ngadto na sa 40 mil pesos matag bulan. ( Divina M. Suson)
