*photo from Initao Municipal Police Station
Gikantahan, gihataga’g bulak ug gilingaw sa mga pick-up lines sa mga pulis sa Initao ang mga single mothers ug mga solo parents atol sa pagsaulog sa Valentine’s Day niadtong Biyernes, Pebrero 14.
Matud pa ni Captain Dino Magno, hepe sa Initao Municipal Police Station, nakahunahuna ang iyang buhatan sa paghatag og pasidungog sa mga inahan apan dili asawa, o kaha mga balo nga babaye, aron mahimo silang mga pulis nga kabahin sa ilang pagsaulog sa Valantine’s Day.
Apan nahimong highlight sa ilang Valentine flower-giving ang pag-sorpesa kang Vivian Magno, ang asawa ni Senior Master Sergeant Jason Magno, ang pulis nga namatay human iyang gi-sapopo ang granada nga mibusikad sulod sa Initao College niadtong Nobyembre sa nakalabay’ng tuig.
Si Jason Magno, kinsa manghud ni Captain Dino Magno, ang gihatagan ni President Duterte og medal of valor.
Niadtong Pebrero 14, gisaulog ni Vivian ang iyang ika-41 nga kasumaran sa iyang adlawng natawhan samtang si Jason, kung wala pa kini namatay, magsaulog unta sa iyang ika-47th birthday niadtong Pebrero 15.
Wala na mapugngi ni Vivian ang paghilak dihang gikantahan siya sa mga kanhi kauban ni Jason tungod kay nahinumduman niya, matud pa, ang kanunay buhaton kaniya sa namatay, nga mas mogasto aron ihatag sa uban kaysa sa iyang kaugalingong birthday.
Miadto sa police station niadtong Biyernes si Vivian aron unta pagkuha og police clearance alang sa iyang anak nga mosulod sa Philippine National Police Academy. (Divina M. Suson, February 17)
