Mga Stall Owners sa Fish Section sa Surigao City Public Market tagtakda ipatawag nan Sangguniang Panlungsod kuman adlawa
Tagtakda na ipatawag kuman adlawa nan mga sakop sa Sangguniang Panlungsod an mga opisyales ug mga nanag-ija nan stall labi na sa Fish Section suyiod sa Surigao City Public Market, ini resulta sa maarang na reklamo na tagpaabot nan mga konsumante sa grabe na pagmahal sa isda ug iban na marine products adton Pasko ug Bag-ong Tuig.
Namahayag an Presidente nan Fish Section na si Adilo Lopez, human natuki didto sa konseho sa siyudad an isyu sa pagmahal nan isda na bariles na miabot sa P450 kada kilo, lakip an nokos sigarilyo sa P500 an kilo, pasayan ug alimango gikan P800 hangtud P1,000 an kada kilo, personal na tagbisitahan nila an panimayay ni Vice Mayor Alfonso Casurra adton Sabado para ipasabot an sitwasyon.
Tagpaklaro pa niini, dili tinuod an mga isyu na nag-strike an mga negosyante ugsa na gamay ra an nagdisplay nan tinda suyod sa merkado sugod adton Biyernes. An nahitabo, gumikan sa istrikto na pagpatuman nan City Ordinance sa Price Ceiling suyod sa merkado, an mga daan mahal na pagkompra sa isda an waya na ipa-display ug ibaligya sa mga stalls kundili na na sa iban na lugar. Sumaya pa, an ordinansa sa price ceiling an 2012 pa an pinaka-ulahi na amendasyon ugsa na kinahanglan na otrohon na kay lahi na an rate sa ila pagkompra pa daan sa isda hangtud sa pagbaligya sa merkado.
Kon kahidumduman, naunang mipadayag sa ila kasagmuyo an Bise Mayor lakip an iban na City Councilors pareho kan Baltazar Abian, Fernando Almeda III ug Rise Faith Recabo sa grabe na pagtaas nan presyo sa isda ug iban na marine products na kon diin tagpadayag na morag wayay nahimo an nagsilbi na Market Supervisor na si Albert Lustiva para kontrolahon an sitwasyon ug sundon an City Ordinance sa price ceiling.
