Mga Station Commanders sang kapulisan sa ICPO, ginmanduan nga mnagpaguwa sang facial composite sketch sang mga suspek sa gina-alegar kaso sang attempted abductions sa Siyudad sang Iloilo..

Ginmanduan ni ICPO Director Sr. Supt. Henry Biñas ang mga station commanders sa idalum sang Iloilo City Police Office nga magpaguwa sang facial composite sketch sang mga suspek sa gina-alegar attempted abductions sa siyudad sang Iloilo.
Ini ang ginpahayag ni ICPO Spokesperson Police Sr. Inspector Sheila Mae Sangrines.
Suno kay Sangrines nga padayon ang pagtutok sang kapulisan sa report nga may mga kabataan nga gintuyo i-abduct sa siyudad sang Iloilo.
Ginpahayag sini nga sa masunod nga pagtililipon sang mga Station commanders, ginalauman nga iga-presenar nila ang composite sketch sang mga suspek kag istoryahan dugang ang mga tikang nga dapat himuon agud malikawan nga may mabiktima sang abduction sa siyudad sang Iloilo.
Una diri, gindugangan sang ICPO ang presensya sang mga pulis sa mga buluthuan sa palibot sang siyudad sang Iloilo kasunod sang nasambit nga report. (sspunay)