Kinahanglan magmatngun ang tanang empleyado sa City Hall sa Butuan, gikan sa regular, contractual ug job orders – sa pagsunod sa gipagawas nga executive order ni Mayor Ronnievic Lagnada nga nagdili kanila sa paglambigit sa bisan unsang illegal nga sugal bisan ug gawas na sa oras ug adlaw tingtrabaho.
Gipasabot ni City Information Officer Eldie David nga nagsumikad usab sa Civil Service Law ang pagdili sa tanang empleyado sa goberno nga malambigit sa illegal nga sugal ug kung mapamatud-an moresulta pa unya sa pagkatangtang nila sa trabaho.
Nagdasig si David sa mga katawhan nga kung adunay mailhan nga empleyado sa city hall kinsa niapil sa illegal nga sugal ang isumbong kini uban sa mga ebidensya aron aksyonan sa Mayor.
Aminado ang opisyal nga nakadawat ug impormasyon si Mayor Lagnada nga adunay pipila ka mga empleyado sa city hall ang na-adik sa illegal nga sugal hinungdan nga nagpagawas kini sa maong kamandoan.
