TACLOBAN CITY – Ginpagawas na han Police Regional Office 8 ha media an mga ngaran han suspek nga nagpapaluyo han pag-atake ha Lapinig Municipal Police Station ha Lapinig Northern Samar dida han Agusto 10.
Basi ha mga nahikay nga ebidensya han Special Investigation Task Group, ginkilala an mga suspek nga hira Ciriaco Jerusalem; Lupito Bucatcat; Rosalinda Espolina; Bartolome Admana.
Ginkilala liwat an iba nga suspek ha ira mga alyas, hi alyas Gimo, Dimit, Megan, Salay, Jona, Myla ngan Lamong.
Sumala kan PRO8 Special Investigation Task Group Chair PSSupt. Reynaldo Dela Cruz, maatubang an mga suspek ha mga kaso nga Frustrated Murder, Attempted Murder ngan Robbery.
Nabaruan naman han PNP ngan papasakahan hin kaso hi Martin “June Boy Tan, hiya an tag-iya han waray plate number nga 6 wheeler isuzu dumptruck nga ginsakyan han mga suspected NPA durante han pag-atake hini ha Lapinig Police Station.
Ini nga mga kaso in naipasaka na han PRO8 ha Department Of Justice (DOJ) Provincial Prosecutor Office ha Northern Samar.
