Ginahibalo na sa karon sang Passi City PNP ang background sang apat ka suspek nga nagpakigbahin sa pagluthang ka gab-I sa kay Mr. Nicanor Labo ang maestro kag isa sa tag-iya sang Madison Grade School sa syudad sang Passi.
Suno sa kay Police Supt. Arturo Fullero natigayun nila nga ma-identify ang mga suspetsado pinaagi sa kuha sang CCTV malapit sa lugar nga ginluntaran sang kremin.
Ang apat ang nagasakay sa duha ka motorsiklo sa diin duha diri ang nagluthang sa biktima samtang duha naman ang nagserbe nga look out.
Dugang pa ni Fullero nga nangin madali ang pagkilala nila sa mga suspek pinaagi sa ila mga testigo bangud wala ang mga ini sang tabon sa nawong kag indi ini tumandok sa nasambit nga lugar.
Nagapakig-ngut na sila sa malapit kag sa iban nga kabanwahanan sa background sang mga suspek.
Sa pihak sini, wala pa sila sang ginalantaw nga motibo sa kremin bangud wala pa nila ma-istorya ang biktima nga yara na subong sa luwas nga kahimtangan sa sulod sang balay bulolngan sa syudad sang Iloilo.
