Personal nga gi-turnover ni Department of Agriculture Regional Director Carlene C. Collado, CPA ngadto sa Provincial Government of Bukidnon pinaagi sa Provincial Veterinary Office ang mga tambal ug bitamina para sa binuhing mga hayop niadtong Agosto 17, 2020 didto sa Provincial Operations Center of Bukidnon, Malaybalay City, Bukidnon.
Ang maong mga tambal ug bitamina nga mikantidad ngadto sa Php 992,100.00 gidawat ni Provincial Administrator Atty. Jay S. Albarece kauban silang Provincial Veterinarian Dr. Nancy Diez, Provincial Agriculturist Alson Quimba kauban ang ilang mga kawani. Lakip na niini ang antibacterial, vitamin B complex, disinfectant ug daghan pang uban nga kabahin sa programa sa Department of Agriculture isip suporta sa Animal Health Program ug African Swine Fever Prevention nga inisyatiba sa maong departamento.
Mapasalamaton usab kaayo si Provincial Governor Jose Ma. R. Zubiri, Jr. ngadto sa Department of Agriculture sa ilang mga programa ug inisyatiba gumikan kay dako kaayo kini ug ikatabang sa mga katawhan sa Bukidnon ilabi na sa mga adunay binuhi nga mga hayop ug aron mabatukan ang pagsulod sa African Swine Fever nga sa kasamtangan wala pa’y natala nga kaso dinhi sa atong probinsya.
