General Santos City— Mukabat sa 14 ka mga search warrant ang gi-serve sa kapulisan sa pag-panguna sa Regional Drug Enforcement Unit sa duha ka mga barangay kung asa duha ang arestado, usa ng patay ug laing duha ang nagpabiling gawasnon.
Sumala kang Police Chief Superintendent Marcelo Morales, Regional Director sa Police Regional Office 12 nga gina-pangingkamutan sa kapulisan nga walay mausik nga kinabuhi panahon sa operasyon apan dili matud pa kini malikayan.
Giila niini ang namatay nga si Mamondas Climaco, hamtong ang pangidaron nga taga National Highway, Brgy. Apopong ug sumala pa high value target.
Samtang gibutyag ni Police Superintendent Maximo Sebastian, labaw RPDEU 12 nga anaa sa Narco List ni Presidente Rodrigo Duterte ang target nga namatay. Gikonsidera matud pa kining notoryus nga drug pusher sa dakbayan kung asa ng area of operation niini mao ang tibuok Brgy. Apopong, Labangal ug Sinawal.
Pagpaklaro niya nga na-validate sa managlahing Intelligence Community ang lihok sa suspek rason nga gipahigayon ang pagronda sa balay niini apan misukol rason nga napatay.
Dugang pamahayag ni PSupt. Sebastian nga adunay mga testigo nga makapamatuod nga walay iregularidad sa gihimong operasyon batok sa namatay nga suspek.
Gani mukabat sa siyam ang ilahang target ug upat niini ang nagpositbo samtang usa ang namatay.
Ang laing upat matud pa ang nagpasabot nga negatibo sa maong operasyon. Samtang ang upat matud pa nga naaresto nga silang Peter Villarosa ug Jamil Agustin ang anaa usab sa narco list.
