Aminado ang ilang mga negosyanteng nagbebenta sa Divisoria ng Christmas decors at gift items na maliit ang kanilang kita kumpara noong nakaraang holiday season.
Ayon sa ilang mga nagtitinda ng Christmas decor, sa pagpasok ng unang linggo ng Disyembre ay bahagyang tumaas ang kanilang kita pero hindi na ito nasundan pa.
Ang iba’t ibang sukat ng Christmas Tree ay mabibili sa halagang P500.00 at P1,000 hanggang P3,000.00.
Ang iba’t ibang decoration na ibinebenta ng kada isang pack sa halagang P100 ang maliit, P150 ang medium, P200 ang large, at P300 ang extra large.
Ang ibang decoration tulad ng mga isinasabit sa Christmas tree ay nananatili sa P100 kada tatlong piraso habang ang Christmas lights ay nasa P150 hanggang P500.00 depende sa haba, klase ng ilaw, at design.
Ang mga nagbebenta naman ng gift items tulad ng key chain, bags, ballpen, wallet, coin purse, pouch, mugs, at iba pa na mabibili sa P35.00 hanggang P200.00 ay aminadong lugi talaga sila sa negosyo.
Paliwanag pa ng ilang mga nagtitinda ng mga gift item, karamihan sa mga produkto nila ay imported na galing China dahil mura ang kuha nito.
