MGA TUNGHAAN SA MISAMIS ORIENTAL UG ILIGAN CITY, MI-KANSELAR NA SA ILANG MGA KALIHUKAN TUNGOD SA CORONA VIRUS DISEASE 2019

35

Mikanselar na sa ilang mga natakdang kalihukan ang mga tunghaan sa Misamis Oriental ug Iligan City isip pagsanong sa kamandoan sa Department of Education tungod sa padayun nga pagkuyanap sa coronavirus disease o COVID-19.

Sa Misamis Oriental, gi-anunsiyo niadtong nakalabay’ng adlaw sa pamunuan sa Manticao Central School, sa lungsod sa Manticao, nga gi-postpone ang parada ug ang koronasyon sa ilang Kiddie King and Queen, nga kabahin sa ilang fundraising event alang sa umaabot nga Brigada Eskwela.


Ang maong kalihukan ipahigayon unta karong adlawa, Pebrero 14.

Matud pa ni Esmer Gaid, principal sa Manticao CS, ilaha na kining gi-move ngadto sa unang semana sa Marso tungod sa kamandoan sa DepEd nga kanselahon ang tanang mga dagkung kalihukan nga makapatapok og daghang tawo.

Ang alumni association sa Cabalantian National High School sa Barangay Cabalantian, sa lungsod gihapon sa Manticao, nag-anunsiyo kagahapon, nga suspendido ngadto na sa unang semana sa Marso ang gitakdang alumni homecoming sa Pebrero 29.

Ang Iligan City National High School main campus, una nang nag-suspende sa ilang Junior-Senior Prom, nga gitakda unta niadtong Pebrero 7.

Pebrero 6 pa lang, mi-anunsiyo na ang pamunuan sa City High nga kanselado kini ngadto na sa Marso.

Sa Tambacan Elementary School sa Barangay Tambacan, magpadayun ang mass deworming ngadto sa mga kabataan apan imbes nga tapukon ang mga bata sa covered court, ang school nurse maoy mo-bisita sa matag classroom.

Sa na-andan, ang nurse maoy mogunit sa tambal aron ihatag sa bata, apan tungod sa COVID-19, ang mga bata na maoy mismo mokuha sa tambal aron ilang ihungit.

Sa Oroquieta City, kagahapon gi-anunsiyo sa kagamhanang lokal ang pagkanselar sa ipahigayon unta nga mass wedding ngadto sa 100 ka mga magti-ayon sa umaabot unta nga Pebrero 28.

Miingon si Mayor Lemuel Meyrick Acosta, regular nga tinuig nila nga kalihukan ang mass wedding nga gitakda matag Pebrero. Wala pay schedule kung kanus-a kini i-hinayon.

Ang kagamhanang lokal sa lungsod sa Tubod, Lanao del Norte nag-anunsiyo nga gi-kansela na ang Valentine event nga ipahigayon unta karong gabii. (Divina M. Suson, February 14)

Facebook Comments