Ginpasuspindir sang Mines and Geosciences Bureau ukon MGB – 12 sang halos isa ka semana ang aktibidad nga ginapatigayon sang Tribal Mining Corporation (TMC) sa parte sang mining site sang nagcollapse ang tunnel sa Brgy. Kematu sa banwa sang Tboli, South Cotabato sa diin isa ka minero sini ang napatay sang tinalikdan nga adlaw.
Suno kay OIC MGB Regional Director Efren Carido, ang nasambit nga rekomendasyon ang resulta sang ginpatigayon nga imbestigasyon sang technical personnel sang ahensya matapos nga nakit-an nga delikado ang lugar.
Samtang suno kay Carido sa tion nga mapatuman na sang TMC ang rehabilitasyon sa nasambit nga mining site kag pasado sa inspection sang mining inspectors sang MGB 12 i-lift man ang ginpapanaug nga suspension order.
Nahibaluan nga nagcollapse ang tunnel nga ginsudlan sang tatlo ka mga minero sang islan nila sang steel ang kahoy nga nagasagang sa nasambit nga tunnel kag sang nadiparahan nga nagakahulog ang magagmay nga mga bato gilayon man ang mga ini nga naggwa, apang si George Man-a ang wala gilayon nakaggwa kag natabunan gid sang mga bato kag lupa.
