Ginpalawig pa tubtob Hulyo 31, 2020 ang implementasyon sang Modified General Community Quarantine ukon MGCQ sa bug-os nga Probinsya sang South Cotabato, ini matapos pirmahan ni South Cotabato Governor Reynaldo Tamayo Jr ang Executive Order Number 40 series of 2020 epektibo kahapon kutob sa katapusan sang bulan.
Suno kay Rudy Jimenea, Executive Officer 4 sang Office of the Provincial Governor magapabailin ang implementasyon sang nauna na nga Executive Order nga anay ginpirmahan sang Provincial Governor.
Samtang gindugang naman sa nasambit nga Executive Order ang pagpahanugot sa angkas nga nauna naman nga gin-aprubahan sang IATF National sa diin magbutang ini sang barrier sa tunga sang motor kag limitado lamang sa mag-asawa.
Luwas pa diri ginpahanugutan man ang 50 percent nga capacity sa mga tourism site, hotel kag resort apang kinahanglan nga magsunod sa ginapatuman nga minimum health standard sang DOH kag Department of Tourism.
Sa pihak nga bahin ginpahayag man ni Sir Rudy nga wala sang matabo nga lockdown sa probinsya matapos nga may nagpositibo sa Barangay Lamba sang Banga nga isa ka OFW nga naghalin sa pungsod Kuwait.
