General Santos City–Dako ang pagtuo ni Apopong Former Barangay Kagawad Ponciano Cimagala nga tungod sa hugtanon niyang kampanya batok droga ug uban pang kriminalidad sa ilang Barangay maoy rason nganong siya gipailawom sa search operation.
Kini ang nahimong reaksyon sa kanhing Barangay kagawad human nga gironda sa kapulisan ang iyang panimalay kagahapon sa kabuntagon.
Nasayran nga nakuhaan ug pusil si Cimagala diin iyang giangkon nga walay dukumento. Rason niini sa paghupot ug armas gumikan na usab sa bahad sa iyang kinabuhi.
Dugang pagbutyag ni Cimagala nga siya aminado nga daghan gyud ang nasuko ngadto kaniya tungod siya maoy punay nga gawitness sa matag operasyon sa PNP batok iligal nga droga ug armas.
Giangkon hinuon sa opisyal nga duna gyud syay sayop sa paghupot ug dili lisensyadong pusil, gani kagahapong adlawa dihang gihimo ang ronda iya nalang gisurender ang gihuptan niining kalibre 45 nga armas.
Giangkon usab ni Cimagala nga wala niya naparehistro ang iyang armas tungod wala syay ibayad sa pagproseso niini.
(Photo from web)
