Ya anuncia este dia el City Licensing Officer Benjie Barredo cay ta privini ya sila el presencia del se llama “middle man” na transaksyon del mga viajero comerciante para el fiesta pilar.
Na entrevista del RMN Zamboanga con Barredo enantes aga,ele ya abla cay solamente directa ya para na su oficina el conducta del aplicasyon y transaksyon del todol mga viajero comerciante y hinde mas sila entretene el cosa papeles que hay pasa con el mga middleman.
Si Barredo ya abla cay ya caba ya sila identifica y llama conesos mga de antes comerciante que ya ekspresa diila intenccion para vende diila mga producto aqui na ciudad y direkta na su ofisina el transaksyon del papeles mientras na ofisina del tresurero el pago.
Solamente ta alcansa lang na mas de syete mil de pesos lang hay paga el cada comerciante quien hay vende como travelling merchant,hinde egual del otro que ta alcansa hasta mas de veinte mil de pesos pasando na mga middleman.
Chene tambien asegun mga linya de coriente y agua na RT Lim boulevard donde canila hay designa para vende inclujido ya el mga portalets y basurahan por el buen sanitaccion na lugar.
Presentamente,chene lang setenta mga viajero negosyante el con quien sila dale permiso para vende na locaccion. -Bhong Simbajon/RMN News
