Sa labing unang higayon, nagkuyog ang militar ug ang Bangsamoro Islamic Armed Forces sa Moro Islamic Liberation Front sa pagsaulog kagahapon sa Eid’l Fitr sulod sa Camp Bilal sa lungsod sa Munai, Lanao del Norte.
Kini bisan paman sa ilang managlahi nga pagtoo ug relihiyon.
Ang Eid’l Fitr gisaulog isip pagtapos sa Ramadan, ang balaan nga bulan sa Islam diin kini ang higayon sa ilang pag-ampo, reflection ug pagpu-asa.
Gisaluhan sa mga kanhi combatant sa MILF ug sa mga sundalo sa gobyerno ang pagkaon nga gi-andam sa Office of the Presidential Adviser of the Peace, Unity and Reconciliation.
Matud pa ni Sadam Uraki, kanhi MILF BIAF fighter, daghan kanila ang unang higayong naka-selebrar sa Eid’l Fitr nga walay kahadlok nga dunay mahitabong engkwentro tungod kay kaniadto, anaa man sila sa bukid nagtago-tago.
Duna usa’y mga sundalo nga unang higayong nakasulay og duyog sa selebrasyon sa mga Muslim.
Matud pa ni Sgt. Arnold Ruben Deita, sundalo sa 4th Mechanized Infantry Battalion, Philippine Army, nalipay siya nga nakauban nila ang kaniadto ilang gi-isip nga kontra.
Miduyog usab sa selebrasyon si Fr. Chito Suganob, kinsa nahimong bihag kaniadto sa Maute-ISIS atol sa lima ka bulan nga giyera sa Marawi City, nga miingong wala siyay kahi-ubos sa mga Muslim.
Dungan sa pagtapos sa Ramadan, gi-anunsiyo ni Abdullah Macapaar ang ilang dagkung operasyon batok sa ilegal nga droga sa Lanao del Norte ug Lanao del Sur.
Si Macapaar, kinsa naila kaniadto nga Commander Bravo nga maoy nanguna sa MILF BIAF sa North Western Mindanao Front, ang membro na karon sa Bangsamoro Transition Authority sa Bangsamoro Autonomous Region in Muslim Mindanao o BARRM.
