Nanawagan ang grupong Akbayan ngadto sa gobyerno og hustisya aron masilotan kadtong mga pulis nga sad-an sa kamatayon ni Kian Delos Santos, 17-anyos, kinsa namatay sa drug raid didto sa Caloocan City, Manila.
Suma ni Justin Balane, pangu sa Akbayan Youth dinhi sa Sugbo, nga ang “Sugbo Alang kang Kian” nga kalihukan, nagtinguha sa pagpaundang sa insidente sa Extra Judicial Killings sa nasud ug ang pag-imbestigar sa kamatayon sa mga tawo nga nalambigit o nadamay sa drug operation sa kapulisan.
Gusto ni Balane nga manubag ang mga pulis nga responsable sa pagpatay kang Kian, lakip si presidente Rodrigo Duterte nga maoy nipasiugda sa war on drugs, ingon man, gusto usab nila nga mohimo og imbestigasyon ang senado kalabot niini.
Si Kian gipasanginlan nga drug runner sa mga pulis nga nisikop ug nakapatay kaniya, human giingong kini nisukol ug nipabuto og armas.
Ang grupo nipahigayon og lihok protesta sa may dalan Colon uban sa grupong The Silent Majority, diin ilang gitapos ang kalihukan pinaagi sa usa ka candle lighting activity.
