Magsilbing ‘peacemakers’ sa eleksiyon ang militar, tali sa mga kandidato nga dunay panagbingkil sa pamilya ug sa pulitika.
Aminado si Col. Alex Aduca, deputy brigade commander sa 2nd Mechanized Infantry Brigade, Philippine Army ug commander sa Task Force Piniliay, ang rido sa pamilya ug sa pulitika maoy usa sa mga hinungdan nga gikonsiderang ‘area of concern’ sa Armed Forces of the Philippines ang mga lungsod sa Pantar, Tagoloan ug Salvador sa Lanao del Norte.
Miingon si Aduca nga ang militar maoy nangita’g pamaagi aron magka-istorya ug magkasinabot ang mga magkaatbang sa pulitika niini nga mga lungsod.
Usa niini mao ang pagpahigayon og candidates forum ug covenant signing, aron magtamod ang matag kandidato nga batunan ug makab-ot ang usa ka malinawon ug tinud-anay nga eleksiyon.
Gawas sa rido o bingkil sa pamilya ug pulitika, gibantayan usab sa militar ang mga private armed groups o mga goons nga posibleng gamiton sa mga pulitiko sa eleksiyon.
