General Santos City—Mukabat sa 72 ka pamilya ang apektado sa panag-engkwentro tali sa militar ug NPA ilawom sa guerilla front 71 sa boundary nga bahin sa barangay Tokawal ug baranagy Alegria, Alabel, Sarangani Province kagahapong adlawa. kini ang gikumperma 1st Lt. Daryl Cansancio, Commanding officer sa Alpha Company sa 73rd Infantry Battalion, Philippine Army.
Nasayran nga alas 6:05 ang takna sa buntag kagahapong adlawa dihang natigayon ang engkwentro human nga nakadawat ug report ang militar nga dunay miyembro sa NPA nga nang extort sa lugar.
Misangko sa 15 minutos ang engkwentro ayha miatras ang mga rebeldi human wala ka atraka sa tropa sa militar nga nakigbinayluay ug bala batok kanila.
Gikumperma usab ni 1st Lt. Cansancio nga usa sa iyang sakop ang nakaangkon ug minor injury sa iyang kamot nga bahin. Samtang base sa impormasyon nga nakaabot ngadto kanila gikan sa mga sibilyan, adunay angol nga gikarga ang grupo sa mga rebeldi.
Nasayran nga mukabat sa 12 hangtod 15 ka mga armado ang ilang nakaengkwentro nga gipangunahan ni Alias Kumander Allan ug Kumander Jerry.
