Sa interview sa DXDC RMN Davao kang PCapt. Marc Jaeson Kristoffer Culaste, Chief of Police sa New Bataan Municipal Police Station, ang mga biktimang namatay mao sila Private First Class (PFC) Jaynor Makakua (driver sa maong sakyanan), Active Auxiliary (CAA) Reynald Balaga ug CAA Ferlan Conception.
Samtang, duna usab unom ka indibidwal ang naangol sa insidente nga daling gidala sa ospital nga mao sila 1LT Fidel V Castro Jr. (INF) PA; Sgt. Michael E. Arzaga PA; Cpl. Emil Joy S. Mission (INF) PA; Pvt Jonel C. Alvarado (INF) PA, CAA Jay Ar Bale ug CAA Kim Ardel Castro.
Sa inisyal nga imbestigasyon, padulong sa Brgy. Andap, New Bataan, Davao De Oro ang nahisgutang personahe alang sa usa ka aktibidad, apan pag-abot sa subidahon nga bahin sa dalan, kalit lang nga napalong ang makina rason nga nahulog ang sakyanan sa sapa.
“Accordingly, mura’g napalong ang makina (sa sakyanan) kay pasaka man gud ‘to siya. Ang driver wala na niya nakontrol. Mao na ‘tong (backhoe) ang nag-recover sa sakyanan kay nahulog gyud sila sa pangpang unya didto na sila sapa naabot,” sulti sa police official.
Sa pagkakaron, padayong giimbestigahan ang insidente. Samtang mipaabot usab og pahasubo ang kabanay ug kaila sa mga nakalas nga mga biktima.
RadyoMaN Kirby Manzon
