General Santos City— Paningkamutan sa militar ug kapulisan nga mahimong hapsay ug malinawon ang pagahimuong plebisto karong adlawa sa syudad sa Cotabato. Sumala kang Major General Cirilito Sobejana, Commanding Officer sa 6th Infantry Division nga ilahang himuon ang tanan aron nga walay matalang kakulian.
Pag-angkon niya nga sa karon aduna silay mga namonitor nga posibleng manabotahe sa kalinaw sa Cotabato ug ARMM alayon sa plebisito apan kontrolado matud pa nila ang sitwasyon.
Dugang pamahayag ni MGen. Sobejana nga nagpakanaug ug hugot nga direktiba si AFP Chief Of Staff General Benjamin Madrigal nga kinahanglang magpabiling mabinantayon ug hugot nga i-monitor ang palibot aron dili malutsan.
Lakip matud pa sa direktiba ni Gen. Madrigal mao ang pagsiguro sa tanang polling precint ang luwas hilabina na ang mga magsilbing Board Of Electorates.
Pagpaklaro niya nga mas labing ginahatagan nila ug pagtagad karon ang syudad sa Cotabato gumikan sa init nga away pulitika ug kini maoy mamahimong sentro nga panggamhanan sa Bangsamoro Region.
Nanawagan usab kini ngadto sa mga motorista nga lauman ng daan ang hinay nga dagan sa trapiko pasulod ug Gotabato gumikan sa mas hugot nga pagbantay sa mga checkpoint.
Sumala kang MGen. Sobejana nga ang paghugot sa mga chekcpoint ang para usab sa kaayuhan sa tanan aron nga masigurong dili masudlan sa mga naga-plano ug dautan.
Pagpaklaro niya nga ang personal nga pagtambong sa lima ka mga cabinet secretary sa gihimong send off ceremony ang pamatuod nga daghan ang naghamdum sa malinawon nga eleksyon sa BOL.
