Davao City – Usa ang industriya sa minahan sa nasud nga labing apektado sa Enhanced Community Quarantine nga gipatuman sa tibuok nasud gumikan sa COVID-19.
Gumikan sa ECQ, ang 23 ka kumpanya sa minahan sa tibuok Pilipinas napugos og pahunong sa ilang operasyon aron mapuggan ang pagtapot sa virus ngadto sa liboan ka mga trabahante sa mga mining sites.
Sumala ni mining consultant Atty.Deo Contreras, ang industriya sa minahan nakatampo og 2% sa 6% sa Gross Domestic Product sa ekonomiya sa nasud subay sa 2019 record sa gobyerno.
Kabahin sa 15 major industries sa Pilipinas ang industriya sa minahan diin anaa sa dul-an 34,000 ka mga Pilipino ang nakatrabaho ug kapin libo ka mga empleyado anaa sa mga copper and ore mining companies.
Sa 2016 record sa Philippine Statistics Authority, ang mining industry sa nasud mikita og P123B diin miparka sa P105.7B ang total expenses sa mga minahan sa tibuok tuig.
Kini nagpasabot nga nawad-an 2% sa GDP kon P123B nga income ang Pilipinas sa paghunong sa operasyon sa mga minahan tungod sa gi-imposar nga ECQ karon sa nasud.
Matud ni Contreras, natam-an sa ECQ ang mga minahan nga nagpabitad paubos sa ekonomiya sa nasud ug sa mga lokalidad tungod sa pagtanggong sa liboan ka mga trabahante sa bililhong industriya sa Pilipinas.
Segun ni Contreras, ang mga angayan utrohon sa kagamhanan mao ang pamaagi sa pagtunol og ayuda imbes i-agi sa kagamhanang lokal ug sa barangay, mas maayongh diritso na sa mga tawo aron ang tanan makadawat.
RadyoMaN Joel Viray
