General Santos City—nakaangkon ug samad sa lawas ang usa ka minor de edad human gidunggab atol sa rumble nga nahitabo sa NLSA Road, Barangay Lagao Gensan.
Biktima giilang si alias Janver, 15, residenti sa purok 5, Barangay Lagao Gensan. Sa inisyal nga imbistigasyon sa kapulisan nasuta nga ala 1:00 ang takna sa kabuntagon kaganina, samtang nag lingkod ang biktima uban ang duha pa niini ka amigo, kalit lang miabot ang grupo sa mga batan-on sakay sa usa ka sikad.
Sila gilayon nga gibato sa mga nasangpit dayon gidunggab ang biktima, mitabang ngadto sa tulo ka minor de edad ang laing grupo sa mga batan-on nga nag standby lang sa lugar mao nga misibat ang mga suspek.
Gidala gilayon sa Dr. Jorge Royeca Hospital si Janver, samtang ang kapulisan nga sakop sa Police Station 3 ang nalarespondi gilayon sa nahitabuan sa rumble.
Sikop ang suspek nga si Alias Raymond ug ang driver sa sikad nga si Ray Catanilao kansa maoy gisakyan sa mga suspetsado. Giangkon usab ni Raymond nga pagpanimalos ang ilang tumong apan iyang giangkon nga ilang naalaan lang ang grupo sa biktima nga ilang kalaban.
Samtang tudo depensa usab sa iyang kaugalingon ang sikad driver. Sumala pa nga wala syay labot sa rumble apan iyang giangkon nga siya maoy gisakyan sa mga suspek. Sa karon gipangita pa sa mga sakop sa Police Station 3 ang suspek nga si alias Keven kansa maoy gitudlong suspek sa pagpanunggab sa biktima.
