Davao City- Gumikan sa minor landslide nga natigayun kagabii sa may Brgy. Langub, Maa, atbang sa karaang dumpsite ning dakbayan sa Dabaw, temporaryong dili una makaagi ang mga dagkong sakyanan sa nasangpit nga lugar.
Nagpahimangno ang City Transport and Traffic Management Office kun CTTMO ngadto sa mga drayber ilabi na sa mga drayber sa dagkong sakyanan ug mga truck gikan sa north ug south nga bahin nga likayan sa karon ang pag-agi sa Diversion road, Maa ning syudad sa gani duha ka linya ang gisarad-an ug dili maagian kagabii apan karong buntag, mga gagmay lang nga mga sakyanan sama sa mga motor ang ginapalusot.
Sa interview sa Serbisyong Straight to the Point kang Dean Ortiz, tigapamaba sa Department of Public Works and Highways DPWH XI, nagpahigayon usab sila karon og clearing operation sa nasangpit nga dalan aron matanggal ang mga debris ug aron maagian na ang dalan.
Samtang sa pikas bahin, nagpahigayon karon og assisted evacuation ngadto sa 40 ka mga pamilyang nagpuyo duol sa nasangpit nga lugar aron ibalhin sa Los Amigos, Tugbok sa pagpanguna sa City Disaster Risk Reduction and Management Council lakip na ang City Social Services and Development Office kun CSSDO ug ubang mga sakop sa Barangay.
RadyoMan Renz Barbarona
