Davao city – Kritikal ang usa ka menor-de-edad human pusila sa gikaaway niini nga army reservist atol sa ilang pag-inum sa Purok 8, San Miguel, Brgy. Indangan, Buhangin District alas 2:20 sa kadlawon.
Kasamtangan gitambalan sa Southern Philippines Medical Center (SPMC) si Jeric Ortiz, 17 anyos, ug nanimuyo sa mao nga barangay human maigo sa ubos sa iyang dughan.
Ang biktima gipusil ni Reynaldo Umpad, 50 anyos, minyo, army reservist, ug residente sa Purok Sta. Cruz, sa samang dapit kinsa nabalhog na karon sa selda sa Buhangin PNP.
Migawas sa imbestigasyon ni SPO1 Allie Plaza nga kalit mibuto ang suspek sa nahimutangan sa biktima ug misangko sa init nga panaglalis ang panagkita sa duha kung asa sila nag-inum.
Gikulata matud pa sa minor ang army reservist hinungdan napugos kini og bunlot sa iyang pistola nga nakasuksok sa iyang hawak ug dayon luthang sa maka-usa ka higayon.
Human sa hitabo daling miiktad sa lugar ang suspek samtang daling gisapupo ang biktima paingon sa SPMC.
Nasayran nga dunay kanhing bikil ang duha nga subling napukaw dihang nag-abot ang ilang mga dalan.
Boluntaryo mitahan kang Brgy. Kagawad Edmund Albaran ang suspek ug gilayon gi-endorso sa Buhangin PNP alang sa dugang disposition.
RadyoMaN Joel Viray
