Roxas City, Capiz – Magabalik na sumugod buwas nga adlaw sang Mierkules, Hunyo 10, 2020 ang misa sa tanan nga kasimbahanan nga sakop sang Archdiocese of Capiz.
Apang ginpahayag sang spokesperson sang Archdiocese of Capiz nga si Rev. Fr.Jose Arturo Emilio Arbatin, 50-percent gid lamang sang total nga kapasidad sang simbahan ang sarang nga makatambong sa misa.
Sa ila sa St. Catherine of Alexandria Parish Church sa banwa sang Mambusao, may yara sang napreparar nga foot bath sa entrance sang simbahan kag pang-sanitize sang mga kamot.
May yara man sang nanari-sari nga gintukod nga komitiba kaangay sang ministry of ushers/hospitality kag ministry of health protocols and sanitation.
May yara man sang igapatigayon nga disinfection matapos ang isa ka misa kag antes ang magasunod nga misa.
Dapat man nga iga-obserbar ang 1-meter tubtob 2-meter nga social distancing, magsuksok sang facemask samtang may iga-provide man nga thermal body scanners.
Base sa IATF Resolution, hugot man nga ginabawalan ang mga persona nga nagapang-edaron sang 21-anyos panubo, 60-anyos pasaka, mga immunodeficiency, comorbidity ukon health risk kag ang mga nagabusong nga mga kababainhan.
Samtang may yara sang bag-o nga pagsulondan ang Archdiocese of Capiz para sa pagpabunyag sa mga simbahan.
Suno pa kay Rev. Fr.Jose Arturo Emilio Arbatin, lima gid lamang ang dapat nga mga tawo nga yara sa sulod sang simbahan kag amo ini ang ginikanan, ang bata, isa ka maninay kag maninoy.
Ang kasal ginatugotan man apang wala na sang abay kag dapat malip-ot lang ang seremonya.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
