Misamis Oriental, gipaubos na sa General Community Quarantine

22

Gipaubos na sa general community quarantine ang lalawigan sa Misamis Oriental human hingpit ng gipirmahan ni gobernador bambi emano ang maong kamanduan.

Kini pinasikad sa Executive Order GYVBE no. 2020-08 nga gipirmahan ni gov. Bambi Emano.


Ang maong deklarasyon gi-anunsyo atol sa multi-agency convergence & Coordination Meeting nga gitambongan sa mga sakop sa PNP, AFP, BFP, municipal mayors, MDRRMO, DILG ug DOH.

Gipatuman ang hingpit nga implementasyon niini alas otso sa gabie niadtong marso 24 hangtud sa alas dose ang takna sa buntag sa Abril katorse.

Nalatid sa maong kamanduan nga dili na tugutan nga makasulod sa entry points sa Lugait ug Magsaysay ang mga tawo nga naggikan sa laing probinsya ug nasud gawas kung kini magdeliver ug pagkaon, mga utanon, krudo o gas, medisina, pagkaon sa hayop, medical supplies, medical equipment ug construction supplies.

Ang mga driver nga gitahasang mudeliver niini kinahanglang makapresentar og certification gikan sa ilang barangay ug sa tag-iya sa kompanya

Ang tanang pasahero ug motorista kinahanglan makapakita ug identification card nga dunay address, pagpamatuod nga residente sila sa Misamis Oriental.




Gitugutan ra usab sa gobernador ang tanang inter-barangay, inter-municipality ug inter-city transactions gikan sa Gingoog, El Salvador ug syudad sa Cagayan de Oro.

Ang tanang klase sa pribado ug pampublikong tulunghaan padayong suspendido hangtud Abril katorse. Padayon usa nga gihingusgan ang social distancing sa tanang panahon labi na sa mga public utility vehicles sama sa jeep ug motorela samtang gidili ang bisan unsang matang sa tapok-tapok.

Ipadayon gihapon ang skeletal workforce sa matag departamento ug bisan sa pribadong mga kompanya.

Samtang sirado hangtud abril katorse ang tanang malls sa lalawigan gawas sa mga supermarkets ug parmasya. Ang mga kan-anan mamahimong mag-operate apan kinahanglang mohimo og pre-emptive measures.

Nalatid sa executive order nga ang Northern Mindanao Medical Center lang ang magsilbing center sa covid-19 nga mga pasyente. Ang mga provincial hospitals kinahanglang dunay holding area alang sa mga nakitaan og simtomas sa maong virus.

Suspendido usab ang dalaw sa mga piniriso sa Misamis Oriental Provincial Jail.

Padayon usab nga ipatuman ang curfew sa tanang edad sugod alas otso sa gabie hangtud alas singko sa buntag.

Gina-monitor sa Department of Trade and Indutry ang mga nanago og namaligya sa mga basic commodities labi na ang mga alcohol ug mask nga maoy mas gikinahanglan karon.

Mamahimo usab nga kasuhan ang masakpan nga magpakatag og fake news sa social media o print.

Facebook Comments