Dako ang posibilidad nga magkita si Misamis Oriental Governor Yevgeny Emano ug Mayor Oscar Moreno sa New York City sa America.
Gibutag ni Vice Governor Jeremy Jigjag Pelaez nga si Emano milarga niadtong Lunes kay miadto sa New York City aron motambong sa 17th Kagay-anon International TAPOK 2019 nga ipasiugda didto sa Sheraton La Guardia East Hotel.
Kini nga Tapok gipasiugda matag duha ka tuig sa Cagayan de Oro City-Misamis Oriental Association of New York Inc.
Matud ni Pelaez nga sigon sa memorandum nga gibilin ug gipirmahan ni Emano nga siya ang Acting Governor sa Misamis Oriental sugod niadtong Lunes hangtud sa July 28.
“Pagka July 29, makabalik na to si Governor Emano gikan sa abroad” matud ni Pelaez.
Tungod niini, gitudlo ni Pelaez si Misamis Oriental Board Member Vincent Pelaez isip Acting Vice Governor sa Misamis Oriental hangtud sa July 28.
Matud ni Pelaez nga dili official apan personal ang biyahi ni Emano sa abroad.
“Mahulog to nga personal kay kaugalingong gasto man to ni Governor Emano ang iyang lakaw wala may gasto ang kapitolyo” matud ni Pelaez.
Apan walay usa mga department heads sa kapitolyo ang makasulti kon asa ang insaktong lakaw ni Governor Emano sukad niadtong Lunes.
Matud ni Carlo Duga-Duga nga public information officer sa Misamis Oriental nga walay bisan usa nga department head sa kapitolyo ang nasayod kon asa mi-adto si Emano.
“Wala man niya ipahibalo asa siya” matud ni Dugu-duga.
Sa pikas nga bahin.
Wala usab masayod si Councilor Roger Abaday nga siya ang gibilin ni Vice Mayor Rainier Joaquin Uy isip Acting Vice Mayor sa City hall.
Nasayran ni Abaday nga siya ang gitudlo isip Acting Vice Mayor kaganina lang buntag sa dihang nagtawag kaniya ang iyang asawa sa telepono samtang mitambong siya sa usa ka convention sa Metro Manila.
“Nakurat lagi ko nga ako man diay ang gibilin isip Acting Vice Mayor” matud ni Abaday.
