Mismanagement vs inflation

Davao City – Mismanagement sa mga ahensiya sa gobyerno sama sa National Food Authority (NFA) ang hinungdan ngano kuwang ang suplay sa bugas ug angat ang presyo sa bugas sa kamerkadohan nga nagsamot og maayo sa inflation rate ngadto na sa 5.7% gikan sa 5.2% niadtong buwan sa Hunyo aning tuiga.

Ang inflation rate nagdeterminar sa suplay sama sa bugas ug uban pa nga maoy usa sa basehan sa dagan sa ekonomiya sa usa ka nasud sama sa pilipinas.

Suma ni Alliance Progressive Labor Group Secretary General Joshua Mata nga wala namao pagdumala sa gobyerno ang tanang aspeto sa pagpadagan sa Pilipinas busa dili ikatingala ang kalit nga pagsaka sa inflation rate sa nasud karon.


Segun ni Mata, ang labing apektado nga sector sa inflation rate kadtong anaa sa poverty line ug wage earners kay sila ang walay igong kapasidad sa pagtugbang sa pagmahal sa mga palaliton sama sa bugas, isda, gulay, ug daghan pang uban.

Busa usa sa nakitang kasulbaran sa epekto sa inflation rate mao ang pag-usbaw sa suholan ngadto sa mga mamumuo ug labaw na kadtong anaa sa marginalized sector kay aron matubag ang ilang nag-unang panginahanglon matag adlaw sama sa bugas, isda, mga bayrunon sa panimay, eskwela, ug uban pa.

Angay sab magpatuman ang gobyerno og price freeze ug suggested retail price aron dili makapatuyang ang mga negosyante sa pagpa-usbaw sa presyo sa ilang mga produkto niining panahon sa kalisdanan ka-ron, dugang ni Mata.

RadyoMaN Joel Viray

Facebook Comments