Davao City – Daw gihiwa-hiwa sa hait nga kutsilyo ang kasing-kasing sa usa ka mister human iyang nasayran nga nangabit ang iyang misis.
Sumala ni Alyas Fredo, 44 anyos, usa ka construction worker, nga mismo ang iyang asawa nga si Alyas Marimar, 33 anyos, ug pulos nagpuyo sa Panacan ang mikumpisal nga may lain na kining lalaki ug nagkagugmaay silang duha.
Sumala sa mister nga sa wala pa hingpit nakigbuwag ang iyang misis aron mu-uban sa bag-ong nakaplagang hinigugma, grabe matud pa ang ilang away ug lalis pasado alas-8:00 sa buntag.
Sakit man nga desisyon apan walay mahimo ang maong bana gawas sa paghatag og kagawasan nga gipangayo sa iyang asawa aron mahatagan og katumanan ang gugma uban matud pa sa kabit niini.
Gi-angkon ni Fredo nga dili niya kaya ihatag ang tanang gusto ug katagbawang materyales tungod sa kagamay sa iyang sweldo isip usa ka construction worker.
Ug mao kini ang gitohoan nga hinungdan ngano hinay nawala ang gugma ni alyas Marimar ngadto sa dehado nga bana.
Apan nanganti ang mister nga iyang ipapreso ang iyang asawa ug ang kabit niini kung mag-uban sa usa ka bubong karon nga nakablotter na sa Sasa PNP ang gihimong pagluib sa way puangod nga asawa.
RadyoMaN Joel Viray
