Davao City – Nagpatabang sa Sasa PNP ang usa ka mister human gihagit kini og pinusilay sa iyang asawa.
Kini human natahap ang misis nga si alyas Arlene nga may kabit ang mister nga si alyas Adrian, 37 anyos, ug nagpuyo sa Brgy. Aliongto hinungdan nga naghuramentado ug nanghagit og draw ang gireklamong asawa.
Matud ni Adrian nga nagdala og punto 45 nga pistola ug punto 38 revolver nga pistola si Arlene ug naghuramentado sa gawas sa iyang gitrabahoan nga car dealer sa may Lanang ning siyudad samtang nanghagit og pinusilay kaniya.
Segun ni Adrian nga nangabobho si Arlene sa usa sa iyang mga kaubanang babaye nga maoy gidudahan nga karelasyon sa nadehadong bana.
Una paman hingpit mibiya si Arlene nagbilin kini og bahad nga iyang ipadagit ang biktima kung dili gayod makig-draw kaniya.
Ug niadtong nakalabay’ng adlaw gibati og kalisang si Adrian kay dunay Mitsubishi nga sakyanan nagtuyok-tuyok sa ilang balay.
Nasuta nga sa miagi pa gibuwagan ni Adrian ang iyang asawa gumikan dili na maantos pa sa mister ang mga akusasyon ni Arlene nga may kabit kini.
RadyoMaN Joel Viray
