Report ni: Tita Jen Palomo Debaja
Lima ka adlaw matapos nagtaliwan ang 32 anyos nga Antiquena sa HK, padayon nga nagapati ang mister nga may foul play sa kamatayon sini.
Base sa nasaksihan sang mister sa ospital kag panuaron sang mga doktor kag opisyal sang konsulado daku ang indikasyon nga wala naghikog ang iya misis.
Apisar nakigkita sa iya ang mga employer sang misis sa konsulado para sa mga claims sini, human na ang desisyon sang mister nga ipakigbato ang hustisya para sa kalinungan sang iya pinalangga nga misis.
Una nga ginbalita nga naghikog ang OFW paagi sa pag inom sang insecticide kag pagbitay sang kaugalingon sa sulod sang CR sa balay sang iya employer apang madamo ang patimaan nga indi ini mahimo sang biktima.
Sa panaysayon sang mister, nagbakasyon sa Antique ang misis sang Hunyo 25 agud magselebrar sang ila ika siyam nga wedding aniversary sang Hunyo 26.
Una nga nagkilalahay ang duwa tuig 2007 sa Manila samtang naga obra pa si mister sa isa ka logistic firm kag nagpakasal sila sa civil tuig 2009.
Dugang pa sang mister, naplanuhan na kuntani nila nga antis magpauli ang misis sa masunod nga Marso, sugaton niya ini sa HK kag malagaw pa tani ang mga ini sa Macau kag China antis magpauli sa Pilipinas.
Sa karon, ginahulat pa ang resulta sang autopsy agud marelease ang death certificate para mapa skedyul ang pag repatriate sang bangkay sa Antique.
