Roxas City, Capiz- Palamangkutanon pa tubtob sa subong sa pamilya ang natabo sa bangkay sang 74-anyos nga tigulang nga babaye nga ginlubong sa Christ the King Memorial Park sa syudad sang Iloilo.
Ini matapos nga makaligad ang napulo ka tuig nga nalubong, wala na-agnas ang bangkay sini.
Suno puya nga Manang Suzeth, wala sang may anuman nga baho nga masimhotan kag halos nga wala sang may nabag-o sa panapton sini subong man ang lungon.
pahayag sini dugang base sa interview sang news team, sang nakaligad nga Lunes nga adlaw ginpakalkal nila ang lubong sang iloy agud nga dungan na lamang nga ilubong kuntani sa nagtaliwan nga puya. Apang ginkakibot sang madiskubrehan nga wala naagnas ang bangkay sa pihak sang malawig nga tinuig nga ini ang nalubong.
Suno naman sa isa sa mga crew sang punerarya, kasubong nga buhi ang nasambitan nga bangkay kag nagakatulog lamang kun sa diin kumpleto sa gihapon ang iya nga buhok kag mga kuko.
Nahibaloan nga sang Setyembre 27, 2008 napatay ang amu nga lola bangud sa atake sa tagipusuon.
Sa subong, yara padayon nga nakahaya sa isa ka punerarya ang nasambitan nga bangkay sang 74-anyos nga lola.
(Hungod nga ginhinago ang iban nga mga detalye bilang pagrespetar sa privacy sang pamilya)
