South Cotabato –Usa ka lalaki nga gitu-ohang miyembro sa New People’s Army ang misurender sa Barangay Tasiman, Lake Sebu, South Cotabato.
Giila ang mitahan nga si Funok Timbang alyas “Boknoy”, 33, residente sa maong lugar, miyembro sa NPA Front 73. Bibit ni Timbang sa iyang pagsurender ang iyang M16 armalite rifle
Usa sa mga rason nganong mitahan si Timbang mao ang tumang kakapoy, gutom ug tumang kahadlok nga bahin ug mamatay sa engkwentro tali sa militar.
Una nang gibutyag ni Lt. Col. Jones Otida, commanding officer sa 27th Infantry Battalion (IB), nga mas gipakusgan pa nila ang paggukod sa mga rebelde nga padayong gapanghasi sa kabukiran.
Samtang padayon usab ang militar sa ilang pagpanawagan ngadto sa uban pang miyembro sa NPA nga buot musurender nga mitahan na sa ilang kaugalingon gumikan dunay naghuwat kanila nga mga programa sa gobyerno alang sa ilang pagbalik sa normal nga kinabuhi. (Jica Rose Parok MSU-Intern)
