General Santos City—Sikop ang usa ka miyembro sa Ansar Al Khinafa Philippines atol sa gihimong operasyon sa hiniusang pwersa sa kapulisan nga gilangkuban sa RIU-12, RID-12, CIB ug uban pang unit sa kapulisan sa may South Osmiña Street, Barangay East Gensan.
Giila ang suspek nga si Jamjo Sala Alias Jumjum. Nadakpan ang nasangpit sa maong lugar diin narekober sa Awtoridad ang usa ka unit sa fragmentation grenade gikan sa posisyon sa suspek .
Ang pagkasikop sa suspek resulta matud pa sa mas gipahugtang intel Monitoring sa tropa sa kapulisan ug sa tabang sa kumunidad.
Si Sala ang kanhing sakop sa namatay nga founder sa AKP nga si Kumander Tukboy Maguid kansa namatay sa operasyon sa kapulisan sa Maasim, pila na ka tuig ang nakabay. Sa kasamtangan ilawom si Sala kang Kumander Salahudin Hassan kansa usa sa mga lider sa Grupong AKP.
Si Sala usa sa mga suspek sa August 2008 attack sa Maasim, Sarangani Province; roadside bombing sa lungsod sa Malapatan, pagpamomba atubangan sa City hall, Gensan niadtong Sept. 16, 2015 nga gikaangol sa pito ka sibilyan; pagpanglabay ug Granada atol sa founding anniversary sa Maasim, Sarangani Province niadtong June 20, 2016 ug na-unsyaming planong pagpamomba sa Kiamba, Sarangani Province niadtong Dec. 11, 2016.
Apil usab kini sa DND arrest order no. 2 ni Pangulong Rodrigo Duterte. Kaganinang buntag, gipasakaan kini ug kaso Kalapasan sa RA 9516 o pag hupot ug eksplosibo.
