General Santos City—Patay ang usa ka pulis human kining gipusil sa wala pa mailhing suspek alas 6:40 ang takna sa gabie sa Corner Guinto Street, Mabuhay Road, Barangay San Isidro, Gensan.
Giila ang biktima nga si Po3 Joseph Allaga Pequierda, legal age, kasamtangang nakabase sa City Mobile Force Company (CMFC-Gensan), residenti sa Salangsang Vill., Guinto St., Barangay San Isidro, Gensan.
Sa inisyal nga imbistigasyon sa Police Station 4 nasuta nga sakay matud pa ang biktima sa motorsiklong gimanihuan sa usa ka Tamtam Dungca, 18, residenti sa Barangay Tambler Gensan, apan pag-abot sa lugar, upat matud pa ka sunod sunod nga buto sa pusil ang nadunggan ni Dungca dayon namatikdan nalang niini nga nahagbong na ang biktimang pulis.
Duha ka mga suspek ang nakit-an nga sakay sa motorsiklo nga pulos nakasul-ob ug kalo dayon naka shorts ug nakaputi ug t-shirt, nakataptap pa ang mga nawong sa mga nasampit kansa maoy nipusil sa biktima.
Nasayran nga gikan ang duruha sa balay ni Piguierda padulong unta sa usa ka operasyon apan sila gisundan sa mga suspek ug gipusil ang biktima nga hinungdan sa iyang kamatayon.
Narekober gikan sa crime scene ang upat ka basyo sa kalibre 45 nga pistola. Usa sa mga anggulong gitutukan karon sa kapulisan mao ang kalabutan sa trabaho sa biktima isip pulis ingon man ang posibling pagpanimalos sa mga nasikop niini nga lambigit sa iligal nga droga.
Ang namatay nga pulis ang una nang nakabasi sa City Drug Enforcement Unit sa Gensan City Police Office, nabalhin sa Police Station 7 ug kasamtangan na karon nga miyembro sa Intel Operatives sa City Mobile Force Company.
Daghan usab ang nahimong accomplishment niini sa kampanya batok iligal nga droga tungod daghan na kini ug mga nadakpan nga mga lambigit sa Illegal Drugs pinaagi sa gipahigayon nilang buybust operation.
