General Santos City—padayon pa karon ang gihimong imbistigasyon sa Polomolok Municipal Police Station kalabutan sa nahitabong pagpamusil sa gikaingong miyembro sa Moro National Liberation Front (MNLF) sa area sa Barangay Lumakil, Polomolok.
Ang biktima giilang si Lito Jungay, Alias Alhadj Aldullatip Jongay, (Balik Islam), 47 anyos, residenti sa Barangay Lumakil, Polomolok. Alas 6:45 ang takna kagabie dihang gipusil sa wala pa mailhing suspek nga nakamotorsiklo ang biktima.
Sa inisyal nga imbistigasyon sa kapulisan nasuta nga gikan sa Barangay Poblacion, Polomolok ang nasangpit nga biktima angkas ang usa ka Romeo Javier, 59, residenti sa Barangay Poblacion pauli na unta sa panimalay sa biktima sila gitaparan sa mga suspek dayon gipusil gamit ang kalibre 45 nga pistola.
Nakadagan si Javier samtang ang biktimang si Jongay ang nakaangkon ug samad sa iyang agtang ug sa iyang liog nga bahin nga hinungdan sa iyang kamatayon.
Paspas usab nga nakasibat ang mga suspek human sa insidenti samtang ang biktima wala na nadala pa sa ospital. Subay sa record sa Polomolok PNP si Jongay ang kanhi nang nadakpan ug napriso gumikan sa kasong R.A 9165 niadtong tuig 2016 apan nakagawas sa prisohan human nga nakapyansa ug P200,000.00.
Sa karon padayon ang gihimong imbistigasyon sa kapulisan kalabutan sa insidenti samtang padayon pa ang gihimong manhunt operation sa kapulisan batok sa mga suspek.
