General Santos City—Gikatakdang karong simanaha na kasuhan sa Alabel Munisipal Police Station ang 2 ka gikaingong miyembro sa New People’s Army kon NPA nga responsabli sa pagsunog sa motorsiklo sa usa ka miyembro sa CAFGU sa hilit nga barangay sa Alabel, Sarangani Province.
Sumala ni Police Chief Inspector Benjie Anchita, Hepe sa Alabel PNP nga una nang midangop sa ilang buhatan ang miyembro sa CAFGU nga si Jimmel Mamalias, hingkod ang panuigon ug residenti sa lungsod sa Alabel bahin sa gihimong pagsunog sa duha ka miyembro sa NPA ngadto sa iyang motorsiklo.
Gikan matud pa kini sa Barangay Poblacion, dihang duha ka mga tawo nga silang si Alias Beheng ug Alias Ruel ang miduol kaniya kansa nagpailang mga miyembro sa 73rd Infantry Battalion.
Siya gisultihan sa duruha nga gipatawag kini sa usa ka opisyal sa militar. Miuban man ang nahisgutan apan pag-abot sa hilit nga lugar nadunggan niini ang sulti sa duruha nga siya ilang patyon tungod siya usa matud pa sa responsabli sa pagpatay sa amahan sa usa sa mga suspek.
Didto na miambak ang biktima sa iyang motorsiklo ug nidagan palayo sa lugar. Didto na gikuha sa mga suspek ang iyang motorsiklo ug gidala sa Sitio Pait, ug didto na gisunog ang motorsiklo.
kasong motornapping ug Arson ang gikatakdang ipasang-at nga kaso sa kapulisan batok sa duha ka mga suspetsado.
