Gipahigayon kagahapong adlawa ang pagpirma sa Memorandum of Agreement kon MOA tali sa Barangay Mapulo, ning siyudad sa Malaybalay ug sa RMN DXMB Malaybalay alang sa feeding program sa Tatak RMN Fans’ Club, Inc.
Nasayran nga mukabat ngadto sa 13 ang kinatibuk-ang ihap sa mga kabataan sa mao nga barangay nga gikonserang underweight ang makabenepisyo sa mao nga programa.
Sa pinaka-ulahing record sa Barangay Nutrition Scholar kon BNS anaa sa 13 ka mga bata ang gikonsiderang malnourished ang gihatagan ug ayuda sa Tatak RMN Fans Club.
Mukabat ngadto sa 23,400.00 ang gitunol sa kahugpungan sa mao nga barangay alang sa 90 ka adlaw nga pagpakaon sa maong mga bata.
Gawas sa mao nga salaping cash, mukabat usab sa 1,000 ka mga bitamina ang gi-apod-apod.
Sa iyang mensahe, gipahayag ni Station Manager Richard Villaronte nga pangandoy sa kahugpungan nga wala nay malnourished sa mao nga barangay paglabay sa tulo ka bulan.
Nanghinaut usab kini nga sa paglabay sa tulo ka bulan aduna nay kalambuan nga mahitabo sa maong mga bata ug hingpit nang ma-rehab gikan sa pagka-undernourished.
Tinguha usab sa Fans club nga mahimong result oriented kini sa tanang programa.
Ang feeding program, usa ka quarterly nga programa sa RMN DXMB Malaybalay.
Sa iyang bahin, nagpasalamat usab ang Barangay Council sa Mapulo sa mao nga programa sa RMN DXMB Malaybalay.
Nakalatid sa MOA nga ang RMN maoy mu-abaga sa kantidad nga gikinahanglan sulod sa 90 ka adlaw nga feeding program.
Samtang ang barangay maoy mupatuman sa mao nga programa, maoy muandam sa menu, magluto ug magmonitor sa timbang sa mga bata ug muhatag ug report sa fans club.
Ang MOA signing gihimo sa Barangay Covered court sa mao nga barangay alas 11 sa buntag kagahapon ug gitimabungan sa barangay opisyales sa Mapulo nga gipangunahan ni Barangay Kapitan Menson Singatao Jr., Richard S. Villaronte ang station manager sa RMN DXMB Malaybalay ug Chairman/Founder sa Tatak RMN Fans’ Club, Inc., mga staff sa RMN Malaybalay, Barangay Nutrition Scholar sa Mapulo, mga coordinators ug member sa Tatak RMN Fans Club, ug ingon man sa mga kabataan nga mahimong benepisiyaryo sa mao nga programa.
Ang mao nga programa giabagan sa Tatak Tisoy Marketing, 648 online fans.
