General Santos City— Moabot na sa 99 porsento ang nahuman na sa pagpanghatag ug SAP sa buhatan sa DSWD sa tibuok Rehiyon 12. Kini subay sa datus nga gipagula sa DSWD Regional Office-12.
Gibutyag ni Dennis Domingo tigpamaba sa Department Of Social Welfare And Development Office, Regional-12 nga ang unang nakakuha ug 100 porsento sa pagpanghatag ug Special Amelioration Program (SAP) mao ang probinsiya sa Sarangani.
Saysay pa sa opisyal nga nagpadayon ang ilahang validation sa mga benepisyaryo sa SAP aron nga masuta si kinsa kadtong nakadawat nga dili unta angayan nga mahimong benepisyaryo sa maong programa ug masayran usab si kinsa kadtong wala na-apil sa listahan nga kwalipikado sa Programa.
Gipaklaro usab ni Domingo nga human sa ilang imbestigasyon ug masayran nga guilty kadtong nakadawat ug pinansyal nga ayuda gikan sa SAP nga wala gi-uli ang kwarta posibleng mapadad-an matud pa ug notice ug andam mo-file ug kaso ang buhatan ngadto na sa mga dili kwalipikado.
Andam usab mo-atubang ang mga empleyado sa DSWD sa Sangguniang Panglungsod sa Gensan aron tubagon ang nahimong palpak sa pagpanghatag ug SAP nga una ng gibutyag ni Kagawad Edmar Yumang nga gusto nilang ipatawag sa hawahanan sa konseho aron mahibaloan usab nila nganong daghang reklamo ang mitumaw sa pagpang-apod sa Social Amelioration Program.(RV)
