Gilusad kagahapon ang mobile library sa Police Regional Office-10 didto sa Sitio Limunsudan, Barangay Rogongon, ning dakbayan sa Iligan.
Kini dungan sa paglusad sa City Task Force to End Local Communist Armed Conflict nga pinasubay sa executive order number 70 ni Pangulong Rodrigo Duterte.
Ang paglusad sa mobile library sa PNP-10 gipanguluhan ni PNP-10 Regional Director Police Brigadier General Rolando Anduyan.
Matud pa ni Anduyan nga ang mobile library nag-target sa paghatag og dugang kahibalo ngadto sa mga kabataang wala nagtungha, ilabina niadtong mga anaa lamang nagpuyo daplin sa dalan o mga street children.
Dili lamang kahibalo sa pagbasa o pag-ihap ang tumong nga itudlo ngadto sa mga bata sa maong police mobile library apan lakip na ang ispirituwal nga kahibalo tungod kay daghan usab sa maong mga libro nga religious ang tema.
Ang maong mga libro gi-donar sa mga pulis nga sakop sa PRO-10 pinaagi sa usa ka dakung box o karton nga anaa sa admin building sa Camp Alagar.
Duha ka mga patrol car sa pulis ang gihimo-an og frame gamit ang kahoy nga maoy gibutangan og mga libro.
Mga pulis nga teacher by profession o gradwado sa edukasyon ang mo-facilitate sa mobile library nga labing una dinhi sa Northern Mindanao, pinaagi sa liderato ni Anduyan. (RadyoMan Divina Suson)
