Hindi napigilang umyak at hinimatay pa ang isang babae sa Turkey matapos gupitan ang buhok ng higit 30 sentimetro sa palabas sa TV.
Lumabas sa programang “Kuaförüm Sensin” o “You’re My Hairdresser” ang modelong si Ilayda kung saan binawasan ang kanyang buhok ng haba na hindi niya inasahan.
Paligsahan para sa mga hairdresser at stylist ang naturang programa na nagdo-donate ng mga ginupit na buhok sa charity na gumagawa ng mga wig para sa mga may cancer.
Ayon sa mga ulat, mas mahaba sa napag-usapan o sa ginusto ng model ang ginupit ng hairdresser.
Noong una’y pinakiramdaman muna ni Ilayda ang kanyang buhok, at maya-maya’y napaiyak na lang nang mapagtanto na mahaba-haba ang nabawas sa kanya.
Aalis na sana sa set nang biglang nanghina at natumba ang model na maswerteng nasalo ng host ng programa.
Usap-usapan ngayon sa social media ang dinanas ng model na para sa marami ay “relatable”.
