Davao City – Aron makahatag og mas dekalidad ug paspas nga serbisyo diha sa pagresponde sa mga emerhensiya sa syudad sa Davao, ideploy sa Central 911 ang duha ka mga moderno ug bag-ong behikulo.
Sa interbyu kang Central 911 head Emmanuel Jaldon, magamit ang Light Search and Rescue (LSAR) vehicles sa managlahing klase sa katalagman sama sa nahugno nga gambalay, aksidente sa kadalanan, mga pagbaha, ingon man back-up panahon kung dunay sunog ilabi na sa mga hilit nga lugar.
Segun ni Jaldon nga ideploy ang LSAR sa Marahan sa Marilog District ug sa Cabantian o Panacan ning syudad sa Davao ug dunay plano pa nga magdugang og usa alang sa Sandawa area.
Ang LSAR dunay bag-ong henerasyon sa komunikasyon, sirens, flashers ug duna kini sukod nga 4 by 4.
Nasayran nga gigahinan og P6.4M pondo ang matag usa ka behikulo.
Subay niini, mapasalamaton si Jaldon sa lokal nga panggamhanan alang sa suporta niini gani mas mapadali na alang kanila ang pagresponde ilabi na sa mga nagapanghitabo gawas sa downtown area.
RadyoMaN Jason Amisola
