General Santos City–Dakong tabang alang sa dakbayan ang paghatag ug licensed to operate sa Department of Health sa Dr Jorge P. Royeca Hospital, ang ospital sa gobyerno sa Gensan, kini human makapasar sa proficiency testing. Sumala kang Hospital Chief Dr. Ryan Aplicador, nga mas dali na alang kanila ang pagsuta kung kinsa ang positibo o negatibo sa covid-19 dili sama sa ginahimo karon nga gina-isolate ang tanang contact sa mga nag-positibo ug ginahulat nga makitaan ug simtomas ayha ipa-ilalom sa swab testing.
Pag-angkon ni Dr. Aplicador nga hangtud Disyembre 31 ang Licensed to operate nga gihatag kanila apan magadepende matud pa sa Research Institute for Tropical Medicine (RITM) kung kanus-a sobling magapa-ilalom sa Proficiency Testing ang Molecular Laboratory sa dakbayan.
Dugang pamahayag Dr. Aplicador nga ang molecular laboratory sa Dr. Jorge Hospital ang usa ka RT-PCR Conventional Method ug dili Cartridge Based. Aduna matud pay available nga extraction testing kits alang sa maong laboratoryo ug wala pa silay nadunggan nga nahutdan ug susamang supply sa merkado. Usa matud pa kini sa hinungdan nga ang maong RT-PCR Conventional Method ang ilahang gipili nga paliton tungod dako ang ilahang pagtuo nga mas magdugay ang maong himan kung itandi sa cartridge based tungod sama sa sitwasyon sa karon nagakulang ang mga cartridge sa tibuok nasud.
Kalabot niini, gibutyag ni Dr. Aplicador nga magadepende sa machine kung pila ang kaya niining i-test sa usa ka adlaw. Sa karon, ilahang testingan ang 20 ngadto na 25 ka mga sets matag adlaw. Nagapangita na usab sila karon ug automated extractor aron mas mapadali ang proseso. Pagpaklaro niya nga gumikan conventional method ang laboratory sa Dr. Jorge, mu-abot pa ug 24 oras ayha mugawas ang resulta kung itandi sa 30 ngadto usa ka oras kung cartridge based ang gamiton.(LVR)
