ZAMBOANGA CITY—Saco-saco y carton-carton lleno de diferentes clase de sigay ya puede confisca desde na un casa na Sta. Catalina durante ta conduci el maga pulis el que se llama house visitation y profiling del dia de Lunes.
Na report desde na City Police Office ta aparese banda alas 2 del tarde cuando el maga pulis del Zamboanga City Public Safety Company junto con el maga oficiales del barangay de Sta. Catalina ya anda na un casa ta dueña el untal Lipae Adjuri donde unu este residencia ya parte del mencionao actividad, pero ya nota el maga otoridad con el monton maga saco y carton tiene laman.
Cuando ya verifica estos, ya puede mira conel maga diferentes clase de sigay que amo el laman del maga saco y carton.
Dayun el maga pulis y el maga oficiales del barangay ya tene que cordina con el City Agriculture Office y Bureau of Fisheries and Aquatic Resources para chequia con el cosa sila ya descunri, donde el dos mencionao agencia de govierno ya confirma que este clase maga sigay ta progibi de sacar desde na mar, bajo na lei nacional.
Con el maga sigay ya tene que confisca el maga otoridad y ya entrega na ofecina del BFAR mientras el caso ta imbestiga pa el maga concierne agencia.
